Il-Gwardjan ta’ Ġenerazzjonijiet Futuri
L-Artikolu 8 tal-Att dwar l-Iżvilupp Sostenibbli, Kap. 521 jistabbilixxi l-Gwardjan ta’ Ġenerazzjonijiet Futuri bl-għan li jiġi ssalvagwardjat l-iżvilupp sostenibbli interġenerazzjonali u intraġenerazzjonali f’Malta.
Wara l-emenda bl-Att Nru I tal-2019, il-kompożizzjoni tal-Kummissjoni ġiet emendata biex l-organizzazzjonijiet volontarji kollha
jintgħarfu bħala kontribwenti għall-aġenda tal-iżvilupp sostenibbli, filwaqt li jiġi żgurat ukoll ir-rikonoxximent dovut tad-dimensjoni
ambjentali bħala t-tielet pilastru tal-iżvilupp sostenibbli.
Viżjoni
Il-Gwardjan għall-Ġenerazzjonijiet Futuri jfittex li jippromwovi, u jinċentiva policies u ideat li jippermettu liċ-ċittadini kollha Maltin u Għawdxin, inkluż dawk ta’ ġenerazzjonijiet futuri, irrispettivament mir-razza, ġeneru u sfondi soċjali, sabiex ikollhom id-dritt li jgħixu f’pajjiż li jipprovdihom bl-aqwa eżiti għall-benesseri tagħhom, u fl-istess waqt, li jkollhom ambjent fejn jistgħu jiksbu s-suċċess u jirnexxu.
Missjoni
Il-Gwardjan għall-Ġenerazzjonijiet Futuri, kif stabbilit fl-Artikolu 8 tal-Att dwar l-Iżvilupp Sostenibbli, Kapitolu 521 tal-Liġijiet ta’ Malta, ifittex li jiżgura eżiti b’saħħithom għaċ-ċittadini kollha f’Malta u Għawdex billi jimplimenta policies effettivi li jirriżultaw f’soċjetà reżiljenti li tieħu in konsiderazzjoni l-interessi u d-drittijiet ta’ kulħadd.
Il-missjoni tal-Gwardjan għandha, għalhekk, tkun dik li tissodisfa lir-rwol kif definit permezz tal-leġiżlazzjoni u l-valuri fundamentali msemmija iktar ’l isfel li fuqhom huwa bbażat il-proċess strateġiku tiegħu sabiex jittejjeb l-iżvilupp sostenibbli permezz ta’ kollaborazzjonijiet kif ukoll rakkomandazzjonijiet ibbażati fuq ir-riċerka.
Strateġija
L-istrategija tal-Gwardjan hija li jidentifika u jippromwovi d-drittijiet u benessiri tas-soċjetà li jwasslu għall-bidla sostenibbli, u dan filwaqt illi jimxi id f’id ma’ istituzzjonijiet akkademiċi, gruppi li għandhom l-istess għan, leġislaturi, kif ukoll entitajiet governattivi.
Il-Proċess Strateġiku (2023 - 2026)
1. Tinħoloq sistema ta’ valuri, liema sistema tkun ispirata mill-Għanijiet tal-Iżvilupp Sostenibbli ppubblikati mill-Ġnus Magħquda*.
2. Jitħejjew studji magħmula fuq ir-rakkomandazzjonijiet, li jkunu bbażati fuq ir-riċerka.
3. Ikun hemm parteċipazzjoni fl-attivitajiet komunitarji.
Il-Prijoritajiet Imħaddna fil-Viżjoni Strateġika
L-istrateġija tal-Gwardjan għall-Ġenerazzjonijiet Futuri hija prinċipalment ispirata minn l-Għan Numru 11*, Bliet u Komunitajiet Sostenibbli, liema Għan jiżgura li l-bliet u l-irħula jkunu inklussivi, sikuri, reżiljenti u sostenibbli. L-oqsma ta’ prijorità jinkludu:
1. L-użu ta’ bini u siti eżistenti;
2. Il-ħolqien ta’ ideat u kunċetti fir-rigward ta’ postijiet pubbliċi, ibbażati fuq ir-realtajiet soċjali, bħal per eżempju, żoni pedonali u toroq sikuri, fl-istess waqt illi jittieħdu in konsiderazzjoni r-rakkomandazzjonijiet tal-minoritajiet u partijiet ikkonċernati oħrajn;
3. L-iżvilupp ta’ komunitajiet permezz ta’ proġetti li jqiegħdu l-interessi tal-persuna, bħas-saħħa u l-benesseri, fiċ-ċentru;
4. Il-promozzjoni tas-sigurtà fl-ambjent urban għal kulħadd.
Il-Valuri u s-Sistema Etika tal-Gwardjan
Il-valuri fundamentali tal-Gwardjan għall-Ġenerazzjonijiet Futuri, huma ġustizzja, rispett, kontabbiltà, kollaborazzjoni, u azzjoni ekwa. Dawn il-valuri huma intenzjonati sabiex jirriflettu s-soċjetà li nixtiequ noħolqu u l-mod ta’ kif inħarsu lejn il-ħidma tagħna. Aħna naspiraw li nipproteġu dawn il-valuri sabiex inħallu impatt pożittiv fuq is-soċjetà tagħna kif ukoll fuq is-sistemi, il-prattiċi u l-policies li jippromwovu d-drittijiet u l-benesseri tat-tfal, adulti, kif ukoll minoritajiet.
Valuri Fundamentali
Il-Ġustizzja
Il-Gwardjan għall-Ġenerazzjonijiet Futuri jaspira li jikkunsidra d-drittijiet umani fit-twettiq tal-ħidma tiegħu sabiex xi darba, is-soċjetà tagħna tkun waħda iktar ġusta u f’armonija, fejn il-benesseri ta’ kulħadd ikunu dejjem protetti. Il-Gwardjan jirrikonoxxi li l-inġustizzja hija minnha nnifisha esperjenza diffiċli.
L-Għaqda Soċjali
Il-punt tat-tluq huwa illi jintwera rispett bejn il-membri fi ħdan il-Gwardjan u dawk li jaħdmu id f’id miegħu. Il-prinċipju tal-Gwardjan fir-rigward tat-trawwim tal-għaqda soċjali fi ħdan il-komunitajiet diversi tagħna jimmira li jibni u jsostni ambjent li jiffjorixxi.
Il-Kontabbilità
Fil-proġetti tiegħu, il-Gwardjan jaspira li jipproteġi rabtiet soċjali u relazzjonijiet eżistenti billi jipprovdi għodod u mezzi sabiex isir dan lill-komunitajiet diversi. L-irwoli ta’ kontabbiltà u prevenzjoni huma ċentrali, filwaqt li jikkumplimentaw l-Għan Numru 11, li jimmira li jrawwem proċessi trasparenti waqt it-teħid ta’ deċiżjonijiet, inklussività u reżiljenza.
Il-Kollaborazzjoni
Il-kollaborazzjonijiet huma ferm importanti għall-Gwardjan u dan sabiex jinkiseb is-sens ta’ għaqda soċjali billi jinvolvi aġenziji pubbliċi, il-policymakers, riċerkaturi, organizzazzjonijiet volontarji sabiex jittieħdu l-aħjar deċiżjonijiet f’rigward it-titjib tal-benesseri tal-kommunitajiet diversi f’pajjiżna.
L-Azzjoni Ekwa
Il-Gwardjan jaħdem sabiex jieħu l-azzjonijiet neċessarji bl-għan li jsir żvilupp aħjar fis-sistemi u l-policies ta’ pajjiżna li jolqtu lil kulħadd, inkluż il-ġenerazzjonijiet futuri. Il-Gwardjan jemmen li tali azzjonijiet jistgħu jgħinu jnaqqsu l-inugwaljanza u l-inġustizzja u fl-istess waqt jingħataw iktar opportunitajiet lit-tfal u l-familji tagħhom, adulti u minoritajiet.
Il-Proġett ‘Coproduction of Healthy, Secure and Playful Spaces’
Il-proġett Coproduction of Healthy, Secure and Playful Spaces huwa mmexxi mill-Gwardjan tal-Ġenerazzjonijiet Futuri, taħt it-tmexxija taċ-Chairperson Dr Rachael M Scicluna, b’kollaborazzjoni mal-Ministeru għall-Ambjent, l-Enerġija u l-Indafa Pubblika u l-Fondazzjoni Gabriel Caruana.
L-inizjattiva għandha l-għan li toħloq spazji urbani vibranti, b’saħħithom, u siguri li jkunu ta’ benefiċċju għar-residenti kollha, u li jtejbu l-kwalità tal-ħajja tal-lokalitajiet taż-Żurrieq, Ħal Safi, u Ħal Kirkop. Permezz tar-riċerka dwar kif il-komunitajiet differenti jħarsu lejn l-ambjent urban u naturali tagħhom, il-proġett ifittex li jinvolvihom fid-disinn biex itejbu l-kwalità tal-ħajja u jnaqqsu d-differenzi fis-saħħa. Il-proġett jenfasizza l-valur soċjali tal-infrastruttura, jippromwovi l-ugwaljanza fis-saħħa, u jinkoraġġixxi l-bini komunitarju, filwaqt li jintegra n-natura permezz ta’ approċċ innovattiv għat-tiswir ta’ spazji aktar b’saħħithom u aktar konnessi.
Permezz ta’ djalogu miftuħ mal-Kunsilli Lokali taż-Żurrieq, Ħal Safi, u Ħal Kirkop, kif ukoll mal-partijiet interessati ewlenin, dan il-proġett joffri għarfien siewi għal min jippjana, l-iżviluppaturi, u dawk li jfasslu l-politika li għandhom l-għan li jħarsu lejn il-benesseri tar-residenti. Dan il-proġett jikkontribwixxi direttament għall-Għan ta’ Żvilupp Sostenibbli 11: Bliet u Komunitajiet Sostenibbli.
Membri tal-Bord
Chairperson
Id-Dott. Rachael Marie Scicluna
Membri
Is-Sa Kirsten Cutajar Miller
Dott. Ian Ellul
Is-Sa Oriana Farrugia
Is-Sa Mariella Schembri
Segretarja
Dott. Tiffany Ann Attard