Att dwar l-Iżvilupp
L-Att dwar l-Iżvilupp Sostenibbli, Kap. 521 ġie adottat fl-2012 u emendat bl-Att Nru I tal-2019. L-għan ta’ dan l-Att hu:
- Li jintegra l-iżvilupp sostenibbli fil-ħidma tal-Gvern;
- Li jqajjem kuxjenza dwar kwistjonijiet relatati mal-iżvilupp sostenibbli u li jippromwovi l-adozzjoni ta’ prattiki sostenibbli fis-soċjetà kollha; u
- Li jrawwem aktar parteċipazzjoni tas-soċjetà ċivili kif ukoll tal-atturi soċjali kollha fl-integrazzjoni tal-iżvilupp sostenibbli.
L-Att dwar l-Iżvilupp Sostenibbli jipprevedi sistema ta’ koordinazzjoni fl-amministrazzjoni pubblika kollha. Huwa jaħtar lill‑ogħla uffiċjali fi ħdan kull Ministeru, is-Segretarji Permanenti, bħala Koordinaturi responsabbli għall-Iżvilupp Sostenibbli u jipprevedi wkoll Persuna ta’ Referenza fl-Iżvilupp Sostenibbli f’kull Ministeru, li f’dan il‑każ huma d‑Diretturi għall‑Iżvilupp tal‑Politika.
L-Att iwaqqaf korpi oħra wkoll, bħall-Gwardjan ta’ Ġenerazzjonijiet Futuri u r-Retikolat għall-Iżvilupp Sostenibbli, li għandhom l-għan li jrawmu l-iskambju ta’ fehmiet varji u jsaħħu d-djalogu nazzjonali kif ukoll il‑promozzjoni u l‑ħarsien tal‑iżvilupp sostenibbli f’Malta.